ଭୁବନେଶ୍ୱର: ଆଜି ଲୋକ ସେବା ଭବନରେ ଅନୁଷ୍ଠିତ ରାଜ୍ୟସ୍ତରୀୟ ରାଜସ୍ୱ ଅଧିକାରୀ ସମ୍ମିଳନୀ ଏବଂ କର୍ମଶାଳାରେ ମୁଖ୍ୟମନ୍ତ୍ରୀ ମୋହନ ମାଝୀ ତହସିଲଦାରମାନଙ୍କୁ ରାଜସ୍ୱ ପ୍ରଶାସନର ମେରୁଦଣ୍ଡ ବୋଲି ଅଭିହିତ କରିଛନ୍ତି। ସେ ରାଜସ୍ୱ ଅଧିକାରୀମାନଙ୍କୁ ଜନସାଧାରଣଙ୍କ ଅଭିଯୋଗ ଧୈର୍ଯ୍ୟର ସହ ଶୁଣିବା ଏବଂ ତୁରନ୍ତ ସମାଧାନ କରିବା ପାଇଁ ନିର୍ଦ୍ଦେଶ ଦେଇଛନ୍ତି।
ମୁଖ୍ୟମନ୍ତ୍ରୀ କହିଛନ୍ତି, “ସମସ୍ୟାର ସମାଧାନ ଏଭଳି ଭାବେ କରନ୍ତୁ ଯେ କାହାରି ଭୁବନେଶ୍ୱର ଆସିବାର ଆବଶ୍ୟକତା ନ ପଡ଼େ। ତହସିଲ କାର୍ଯ୍ୟାଳୟ ହେଉଛି ଜମି ସମ୍ପର୍କିତ ସମସ୍ୟାର ସମାଧାନ କେନ୍ଦ୍ର। ତହସିଲ ସ୍ତରରେ ସମସ୍ୟା ଅମୀମାଂସିତ ରହିଲେ ମାମଲା କୋର୍ଟକୁ ଯାଏ। ଯଦି ସମସ୍ୟା ମୂଳସ୍ତରରେ ସମାଧାନ ହୋଇପାରେ, ତେବେ ଲୋକଙ୍କୁ ଭୁବନେଶ୍ୱର ଆସିବାକୁ ପଡ଼ିବ ନାହିଁ। ଜନସାଧାରଣଙ୍କ ଅଭିଯୋଗ ଧୈର୍ଯ୍ୟର ସହ ଶୁଣନ୍ତୁ ଏବଂ ସମୟୋପଯୋଗୀ ସମାଧାନ ନିଶ୍ଚିତ କରନ୍ତୁ।”
ଏହି ଅବସରରେ ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ମଧ୍ୟ ଅଧିକାରୀମାନଙ୍କୁ ଉତ୍ସାହିତ କରି କହିଛନ୍ତି, “ଜନସାଧାରଣଙ୍କୁ ଭିଆଇପି ମର୍ଯ୍ୟାଦା ଦିଅନ୍ତୁ। ତହସିଲ କାର୍ଯ୍ୟାଳୟକୁ ଜନବାନ୍ଧବ କରନ୍ତୁ। ଏହା କେବଳ ଏକ ମ୍ୟାଚ୍ ନୁହେଁ, ଏକ ଟୁର୍ଣ୍ଣାମେଣ୍ଟ — ଆପଣଙ୍କୁ ଏହା ଜିତିବାକୁ ହେବ। ନାଗରିକମାନଙ୍କୁ ସମ୍ମାନ ଓ ଉଷ୍ମତାର ସହ ବ୍ୟବହାର କରନ୍ତୁ। ରାଜସ୍ୱ ବିଭାଗ ହେଉଛି ୫୧ଟି ବିଭାଗର ମେରୁଦଣ୍ଡ। ଓଡ଼ିଶା ଭିଜନ ଡକ୍ୟୁମେଣ୍ଟକୁ ସାକାର କରିବାରେ ଆପଣଙ୍କ ଭୂମିକା ଗୁରୁତ୍ୱପୂର୍ଣ୍ଣ। କୌଣସି ତହସିଲରେ କେହି ଜମିହୀନ ରହିବା ଉଚିତ୍ ନୁହେଁ। ଏବେ ବି ମାଲକାନଗିରିରୁ ଲୋକେ ଜମି ସୀମାଙ୍କନ ପାଇଁ ମୋ ପାଖକୁ ଆସୁଛନ୍ତି। ସେବା ଯୋଗାଣ ଏବେ ଆରମ୍ଭ ହୋଇଛି। ଯେଉଁ ଦିନ ଲୋକେ ଅଭିଯୋଗ ନେଇ ଆସିବେ ନାହିଁ, ସେହି ଦିନ ଆମେ ଜାଣିବୁ ଯେ ରାଜସ୍ୱ ସେବା ପ୍ରକୃତରେ କାର୍ଯ୍ୟକ୍ଷମ ହୋଇଛି।”
