ସମ୍ବଲପୁର: ଭାରତ-ପାକିସ୍ତାନ ମଧ୍ୟରେ ଚାଲିଥିବା ଉତ୍ତେଜନାପୂର୍ଣ୍ଣ ପରିସ୍ଥିତିକୁ ଦୃଷ୍ଟିରେ ରଖି ସମ୍ବଲପୁର ଜିଲ୍ଲାରେ ସିଭିଲ ଡିଫେନ୍ସ କଣ୍ଟ୍ରୋଲ ରୁମ୍ ଖୋଲାଯାଇଛି। ଏସ୍ପିଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ଗୁରୁତ୍ୱପୂର୍ଣ୍ଣ ବୈଠକ ପରେ ଏହି ନିଷ୍ପତ୍ତି ନିଆଯାଇଛି। ଜିଲ୍ଲାର ସମସ୍ତ ପ୍ରବେଶ ପଥରେ କଡ଼ା ଯାଞ୍ଚ ବ୍ୟବସ୍ଥା ଲାଗୁ କରାଯାଇଛି, ଯେଉଁଠାରେ ବାହାରୁ ଆସୁଥିବା ବ୍ୟକ୍ତିଙ୍କ ପରିଚୟପତ୍ରର ସମ୍ପୂର୍ଣ୍ଣ ଯାଞ୍ଚ କରାଯିବ।
ଏହି କଣ୍ଟ୍ରୋଲ ରୁମ୍ ୨୪ ଘଣ୍ଟା ସଚଳ ରହିବ ଏବଂ ଜରୁରୀ ସ୍ଥିତିରେ ଲୋକମାନେ ୮୦୧୮୨୫୦୦୦୧ ନମ୍ବରରେ ଯୋଗାଯୋଗ କରିପାରିବେ। ଡେପୁଟି ଏସ୍ପି ଏବଂ ଓଡ଼ିଶା ରାଜସ୍ୱ ସେବାର ଜଣେ ଅଧିକାରୀଙ୍କୁ ଏହି କଣ୍ଟ୍ରୋଲ ରୁମ୍ର ଦାୟିତ୍ୱ ନ୍ୟସ୍ତ କରାଯାଇଛି। ଜିଲ୍ଲା ପ୍ରଶାସନ ସିଭିଲ ଡିଫେନ୍ସ ମକ୍ଡ୍ରିଲ ଆୟୋଜନ କରିବା ସହ ଅଧିକ ସଂଖ୍ୟକ ସ୍ୱେଚ୍ଛାସେବୀଙ୍କୁ ଏଥିରେ ସାମିଲ କରିଛି।
ଜିଲ୍ଲାପାଳ ସମସ୍ତ ନାଗରିକଙ୍କୁ ସଚେତନ ରହିବାକୁ ଅପିଲ କରିଛନ୍ତି, କିନ୍ତୁ କୌଣସି ଭୟ ନ କରିବାକୁ ମଧ୍ୟ କହିଛନ୍ତି। ସୁରକ୍ଷା ବ୍ୟବସ୍ଥାକୁ ଅଧିକ ସୁଦୃଢ଼ କରିବା ପାଇଁ ପୁଲିସ ଓ ପ୍ରଶାସନ ସମ୍ପୂର୍ଣ୍ଣ ଆଲର୍ଟ ମୋଡ଼ରେ ରହିଛି। ଏହା ସମ୍ବଲପୁରର ସମ୍ବେଦନଶୀଳ ଅଞ୍ଚଳଗୁଡ଼ିକରେ ଶାନ୍ତି ଓ ନିରାପତ୍ତା ବଜାୟ ରଖିବାର ଏକ ଅଂଶ ବୋଲି ଜଣାପଡ଼ିଛି।
