ବରଗଡ଼ ସରକାରୀ ବସ୍ଷ୍ଟାଣ୍ଡରେ ସମସ୍ୟାର ସମାଧାନ ହେଉନାହିଁ। ଏହି ବସ୍ଷ୍ଟାଣ୍ଡ ରାଜ୍ୟର ଅନ୍ୟତମ ପୁରାତନ ସରକାରୀ ବସ୍ଷ୍ଟାଣ୍ଡ ମଧ୍ୟରୁ ଗୋଟିଏ। ଓଡ଼ିଶାର ଅନେକ ସରକାରୀ ବସ୍ଷ୍ଟାଣ୍ଡ ଆଧୁନିକୀକରଣ ଓ ନବୀକରଣ ହୋଇଥିବା ବେଳେ, ଏହା ସରକାରଙ୍କ ଅବହେଳାର ଶିକାର ହୋଇଛି। ସରକାରୀ ସ୍ତରରେ ଏହି ବସ୍ଷ୍ଟାଣ୍ଡକୁ ନିକଟସ୍ଥ ଏକ ଘରୋଇ ବସ୍ଷ୍ଟାଣ୍ଡକୁ ସ୍ଥାନାନ୍ତର କରିବାର ଯୋଜନା ରହିଛି। ଏହି ଉଦ୍ଦେଶ୍ୟରେ ସ୍ଥାନୀୟ ବିଧାୟକ ଓ ବିଭାଗୀୟ ଅଧିକାରୀମାନେ ଜମି ଚିହ୍ନଟ କରିଛନ୍ତି। କିନ୍ତୁ ବର୍ତ୍ତମାନ ସୁଦ୍ଧା ସହର ମଧ୍ୟରେ ଥିବା ଏହି ପୁରାତନ ବସ୍ଷ୍ଟାଣ୍ଡରେ ମୌଳିକ ସୁବିଧାର ଅଭାବ ରହିଛି ଏବଂ ନୂଆ ସ୍ଥାନ କେବଳ ଚିହ୍ନଟ ସ୍ତରରେ ସୀମିତ ରହିଛି।
ସ୍ୱଚ୍ଛତା ବ୍ୟବସ୍ଥା ସମ୍ପୂର୍ଣ୍ଣ ଭାଙ୍ଗି ପଡ଼ିଛି ଏବଂ ନାଳୀ ପରିଚାଳନାର ଅବ୍ୟବସ୍ଥା ଦୈନନ୍ଦିନ ସମସ୍ୟା ସୃଷ୍ଟି କରୁଛି। ବସ୍ଷ୍ଟାଣ୍ଡରେ ଥିବା ଶୌଚାଳୟଗୁଡ଼ିକ ତାଲା ପଡ଼ି ରହୁଛି, ଯାହା ଯାତ୍ରୀଙ୍କ ପାଇଁ ଗୁରୁତର ଅସୁବିଧା ସୃଷ୍ଟି କରୁଛି। ବସ୍ଷ୍ଟାଣ୍ଡ କର୍ତ୍ତୃପକ୍ଷ, ସ୍ଥାନୀୟ ପୌର ପ୍ରଶାସନ ଏବଂ ଜନପ୍ରତିନିଧିଙ୍କ ସମ୍ମୁଖରେ ଏହି ଅବସ୍ଥା ସ୍ପଷ୍ଟ ଥାଇ ମଧ୍ୟ କୌଣସି ସଂଶୋଧନମୂଳକ ପଦକ୍ଷେପ ନିଆଯାଇନାହିଁ। ଏହା ଜନସାଧାରଣଙ୍କ ମଧ୍ୟରେ ଅସନ୍ତୋଷ ବଢ଼ାଇଛି।
ବରଗଡ଼ ବସ୍ଷ୍ଟାଣ୍ଡରୁ ସମ୍ବଲପୁର, ବଲାଙ୍ଗୀର, ସୁନ୍ଦରଗଡ଼, ଭୁବନେଶ୍ୱର, କେନ୍ଦୁଝର, ଭବାନୀପାଟଣା, ଦେଓଗଡ଼ ଓ ସୋନପୁର ଆଦି ଜିଲ୍ଲାକୁ ନିୟମିତ ବସ୍ ସେବା ଚାଲୁ ରହିଛି। ଏହା ସହ ବରଗଡ଼ ଓ ସମ୍ବଲପୁର ମଧ୍ୟରେ ସିଟି ବସ୍ ଏବଂ ବରଗଡ଼ ଜିଲ୍ଲାର ବିଭିନ୍ନ ବ୍ଲକକୁ ଲକ୍ଷ୍ମୀ ବସ୍ ପ୍ରତିଦିନ ଚଳାଚଳ କରୁଛି। ସ୍କୁଲ ଓ କଲେଜ ଛାତ୍ରଛାତ୍ରୀ, ଚାକିରିଜୀବୀ, କୃଷକ ଓ ବ୍ୟବସାୟୀଙ୍କ ସମେତ ସାଧାରଣ ଜନତା ଏହି ବସ୍ଷ୍ଟାଣ୍ଡ ଉପରେ ବହୁଳ ଭାବେ ନିର୍ଭର କରନ୍ତି। ଫଳରେ, ଏହି ଅଞ୍ଚଳ ପ୍ରତିଦିନ ଯାତ୍ରୀଙ୍କ ଭିଡ଼ରେ ପରିପୂର୍ଣ୍ଣ ରହୁଛି।
ବସ୍ଷ୍ଟାଣ୍ଡରୁ ଚଳାଚଳ କରୁଥିବା ବସ୍ଗୁଡ଼ିକର ସଂଖ୍ୟା ବଢ଼ୁଥିବା ବେଳେ ଯାତ୍ରୀଙ୍କ ସମସ୍ୟା ମଧ୍ୟ ବୃଦ୍ଧି ପାଉଛି। ତଥାପି, ବସ୍ଷ୍ଟାଣ୍ଡର ମୌଳିକ ସମସ୍ୟାଗୁଡ଼ିକ ଅମୀମାଂସିତ ରହିଛି। ଅଳ୍ପ ବର୍ଷା ହେଲେ ବି ପରିସର ମଧ୍ୟରେ ମଇଳା ପାଣି ଜମି ରହୁଛି। ଶୌଚାଳୟଗୁଡ଼ିକର ଅବସ୍ଥା ମଧ୍ୟ ଦୟନୀୟ, ଯାହା ଖରାପ ହେଲେ ମାସ ମାସ ଧରି ତାଲା ପଡ଼ି ରହୁଛି।
ସାଂସଦ ସଞ୍ଜୟ ଭୋଇଙ୍କ ଅନୁଦାନରୁ ଯାତ୍ରୀଙ୍କ ସୁବିଧା ପାଇଁ ଶୌଚାଳୟ ଓ ପାନୀୟ ଜଳ ବ୍ୟବସ୍ଥା ନିର୍ମାଣ କରାଯାଇଥିଲା। ଗତ ସାଧାରଣ ନିର୍ବାଚନ ପୂର୍ବରୁ ଶୌଚାଳୟର ନବୀକରଣ କରାଯାଇ ପୌର ପ୍ରଶାସନର ଦାୟିତ୍ୱରେ କିଛି ଦିନ ଚାଲିଥିଲା। କିନ୍ତୁ ବର୍ତ୍ତମାନ ଏହା ପୁନର୍ବାର ଅଚଳ ହୋଇ ତାଲା ପଡ଼ି ରହିଛି। ଫଳରେ, ଯାତ୍ରୀମାନେ ଶୌଚାଳୟ ପଛପଟେ ଖୋଲା ସ୍ଥାନରେ ଶୌଚ କରିବାକୁ ବାଧ୍ୟ ହେଉଛନ୍ତି। ଏହାଠାରୁ ମଧ୍ୟ ଖରାପ ଯେ, ଆଖପାଖରେ ଜମି ରହିଥିବା ନାଳୀ ପାଣି ଦିନ ଦିନ ଧରି ସଫା କରାଯାଉନାହିଁ, ଯାହା ମଶା ଓ ମାଛି ବୃଦ୍ଧି କରି ବିଭିନ୍ନ ରୋଗର ଆଶଙ୍କା ସୃଷ୍ଟି କରୁଛି। ଏହି ଅଞ୍ଚଳରେ ଦୁର୍ଗନ୍ଧ ଓ ଅସ୍ୱାସ୍ଥ୍ୟକର ପରିବେଶ ବିରାଜ କରୁଛି।
ଏପରିକି ସମ୍ପ୍ରତି କାଳବୈଶାଖୀ ଝଡ଼ରେ ପଡ଼ିଥିବା ଏକ ଗଛ ମଧ୍ୟ ଏ ପର୍ଯ୍ୟନ୍ତ ହଟାଯାଇନାହିଁ। ଏହି ପରିସ୍ଥିତି ରାଜନୈତିକ ଓ ପ୍ରଶାସନିକ କର୍ତ୍ତୃପକ୍ଷଙ୍କ ଦ୍ୱାରା ଏହି ଜନସାଧାରଣଙ୍କ ସୁବିଧାର ଅବହେଳାକୁ ସ୍ପଷ୍ଟ କରୁଛି, ଯାହା ଜନଅସନ୍ତୋଷକୁ ବଢ଼ାଇ ତୁଳୁଛି।
