ସମ୍ବଲପୁର: ଶନିବାର ସକାଳେ ରାରେଢ଼ାଖୋଲ ଅଞ୍ଚଳର ବୁର୍ଦା ପଞ୍ଚାୟତ ଅଧୀନସ୍ଥ ବାଦାମାଲ ଗାଁରେ ଏକ ଅମାନୁଷିକ ଘଟଣା ଘଟିଛି। ଜମି ବିବାଦକୁ କେନ୍ଦ୍ର କରି ଜଣେ ବ୍ୟକ୍ତିଙ୍କୁ ତାଙ୍କ ଚାଷ ଜମିରେ ହତ୍ୟା କରାଯାଇଛି। ମୃତକଙ୍କ ନାମ ପ୍ରଫୁଲ୍ଲ ନାୟକ। ସେ ଆଜି ନିଜ ଜମିରେ କାମ କରୁଥିବା ବେଳେ ଗାଁର ବିଭୂତି ପ୍ରଧାନଙ୍କ ସହ ଜମି ସଂକ୍ରାନ୍ତ ବିବାଦରୁ ତର୍କାତର୍କି ହୋଇଥିଲା। ପ୍ରଫୁଲ୍ଲଙ୍କ ଜମି ବିଭୂତିଙ୍କ ଜମି ପାଖରେ ଥିବାରୁ ଏହି ବିବାଦ ଉପୁଜିଥିଲା।
ଅଭିଯୋଗ ଅନୁଯାୟୀ, ବିଭୂତି ପ୍ରଧାନ, ତାଙ୍କ ପତ୍ନୀ, ଭାଇ ଓ ମା’ ମିଳିତ ଭାବେ ପ୍ରଫୁଲ୍ଲଙ୍କ ଉପରେ ଆକ୍ରମଣ କରିଥିଲେ। ଏହି ଆକ୍ରମଣରେ ପ୍ରଫୁଲ୍ଲଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିଲା। ହତ୍ୟା ପରେ ତିନି ଅଭିଯୁକ୍ତ ଘଟଣାସ୍ଥଳରୁ ପଳାଇଛନ୍ତି ଏବଂ ଏଯାଏ ସେମାନେ ପୁଲିସ୍ ହାତରେ ଧରାପଡ଼ି ନାହାନ୍ତି। ସୂଚନା ପାଇବା ପରେ ରାଇରାଖୋଲ୍ ପୁଲିସ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ବିଭୂତି ପ୍ରଧାନଙ୍କୁ ପୁଲିସ୍ ଅଟକ ରଖି ପଚରାଉଚୁରା କରୁଛି।
ଏହି ଘଟଣା ସ୍ଥାନୀୟ ଅଞ୍ଚଳରେ ଆତଙ୍କ ସୃଷ୍ଟି କରିଛି। ପୁଲିସ୍ ଅଭିଯୁକ୍ତମାନଙ୍କୁ ଧରିବା ପାଇଁ ତୀବ୍ର ଅନୁସନ୍ଧାନ ଜାରି ରଖିଛି।
