ଭୁବନେଶ୍ୱରରେ ଜମି ଦର ଅତ୍ୟଧିକ ବୃଦ୍ଧି ପାଇବା ମଧ୍ୟବିତ୍ତ, ନିମ୍ନ-ମଧ୍ୟବିତ୍ତ ଓ ଆର୍ଥିକ ଦୁର୍ବଳ ବର୍ଗଙ୍କ ପାଇଁ ଘର କିଣିବାକୁ ଏକ ଦୁଷ୍କର ସ୍ୱପ୍ନ ହୋଇଛି। ଏକ ଆପାର୍ଟମେଣ୍ଟର ମୂଲ୍ୟ ପ୍ରାୟ ୧ କୋଟି ଟଙ୍କା ଛୁଇଁଥିବାରୁ ରାଜଧାନୀରେ ଜମି କିଣି ଘର ନିର୍ମାଣ ପାଇଁ ପ୍ରଚୁର ଆର୍ଥିକ ସାମର୍ଥ୍ୟ ଆବଶ୍ୟକ।
ଏହି ସମସ୍ୟାକୁ ଦୃଷ୍ଟିରେ ରଖି ନଗର ଉନ୍ନୟନ ବିଭାଗ ସୁଲଭ ମୂଲ୍ୟରେ ଗୃହ ପ୍ରକଳ୍ପ ଆରମ୍ଭ କରିଛି। ପ୍ରସ୍ତାବିତ ଯୋଜନା ଅନୁଯାୟୀ, ୧୦ ଲକ୍ଷରୁ ଆରମ୍ଭ କରି ୧ କୋଟି ଟଙ୍କା ପର୍ଯ୍ୟନ୍ତ ଗୃହ ଉପଲବ୍ଧ ହେବ, ଯାହା ବିଭିନ୍ନ ଆର୍ଥିକ ବର୍ଗର ଲୋକଙ୍କୁ ସୁବିଧା ଦେବ। ମୁଖ୍ୟ ସଚିବ ଉଷା ପାଢ଼ୀଙ୍କ ଅଧ୍ୟକ୍ଷତାରେ ଏକ ସଭାରେ ଏହି ପ୍ରକଳ୍ପ ନେଇ ଆଲୋଚନା ହୋଇଛି। ଉତ୍କଳ ହସ୍ପିଟାଲ ନିକଟରେ ଏକ ଗୃହ ପ୍ରକଳ୍ପ ଆରମ୍ଭ ହେବ ଏବଂ ସରକାର ପବ୍ଲିକ୍-ପ୍ରାଇଭେଟ୍ ପାର୍ଟନରସିପ୍ (PPP) ମଡେଲରେ ୬୦:୪୦ ଅଂଶୀଦାରୀରେ ବେସରକାରୀ ନିର୍ମାଣ ସଂସ୍ଥା ସହ କାମ କରିବେ।
ଏହା ନିମ୍ନ ଆୟ ବର୍ଗର ଲୋକଙ୍କ ରାଜଧାନୀରେ ଘର କିଣିବା ସ୍ୱପ୍ନକୁ ପୂରଣ କରିବ। ଅତିରିକ୍ତ ସଚିବ ଦେବାଶିଷ ସିଂହ ଓ ଆର୍ଥିକ ଉପଦେଷ୍ଟା ଶିଖା ବିଶାଲ ସମ୍ପ୍ରତି ଫିଲିପାଇନ୍ସର ମନିଲାରେ ସୁଲଭ ଗୃହ ମଡେଲ ଅଧ୍ୟୟନ କରିଛନ୍ତି। ମେ ୨୭ରୁ ୩୦ ତାରିଖ ମଧ୍ୟରେ ଅନୁଷ୍ଠିତ ସେମିନାରରେ ନଗର କ୍ଷେତ୍ରରେ ସୁଲଭ ଗୃହ ପ୍ରଦାନ ନେଇ ଆଲୋଚନା ହୋଇଛି। ସିଂହ କହିଛନ୍ତି, ପ୍ରଭାବଶାଳୀ ମଡେଲ ଚିହ୍ନଟ ହେଲେ ଓଡ଼ିଶାରେ ତାହା ଶୀଘ୍ର କାର୍ଯ୍ୟକାରୀ ହେବ।
ନଗର ଉନ୍ନୟନ ସଚିବ ଗଙ୍ଗାଧର ନାୟକ କହିଛନ୍ତି, ଭୁବନେଶ୍ୱର ଓ ଆଖପାଖ ଅଞ୍ଚଳରେ ଅନେକ ସୁଲଭ ଗୃହ ପ୍ରକଳ୍ପ ଆରମ୍ଭ ହେବ। ପ୍ରାରମ୍ଭିକ ଭାବେ ଉତ୍କଳ ହସ୍ପିଟାଲ ଓ ଉତ୍କଳ ହାଇଟ୍ସ ନିକଟରେ ୧୦-୧୧ ଲକ୍ଷ ଟଙ୍କାରେ ଗୃହ ଉପଲବ୍ଧ ହେବ। ପରବର୍ତୀ ପର୍ଯ୍ୟାୟରେ ଦୁଇଟି ଅଧିକ ପ୍ରକଳ୍ପ ହାତକୁ ନିଆଯିବ, କିନ୍ତୁ ଜମି ଦର ବୃଦ୍ଧି ଆଶଙ୍କାରୁ ପ୍ରକଳ୍ପ ଅବସ୍ଥାନ ସମ୍ପର୍କୀୟ ତଥ୍ୟ ପରେ ପ୍ରକାଶ କରାଯିବ।
