ନୂଆଦିଲ୍ଲୀ: ଏସିଆନ ନ୍ୟୁଜ ଇଣ୍ଟରନ୍ୟାସନାଲ (ଏଏନଆଇ) ବିରୋଧରେ ଭାରତୀୟ ୟୁଟ୍ୟୁବରମାନେ ସାଂଘାତିକ ଅଭିଯୋଗ ଆଣିଛନ୍ତି। ଏଏନଆଇ ୟୁଟ୍ୟୁବର କପିରାଇଟ ଷ୍ଟ୍ରାଇକ ସିଷ୍ଟମକୁ ଦୁରୁପଯୋଗ କରି କଣ୍ଟେଣ୍ଟ କ୍ରିଏଟରଙ୍କଠାରୁ ମୋଟା ଅଙ୍କର ଟଙ୍କା ଦାବି କରୁଥିବା ଅଭିଯୋଗ ହୋଇଛି। ଜଣାଶୁଣା ୟୁଟ୍ୟୁବର ମୋହକ ମଙ୍ଗଳ ଦାବି କରିଛନ୍ତି ଯେ, ମାତ୍ର ୯ ଓ ୧୧ ସେକେଣ୍ଡର ଫୁଟେଜ ବ୍ୟବହାର ପାଇଁ ଏଏନଆଇ ତାଙ୍କ ଚ୍ୟାନେଲରେ ଦୁଇଟି କପିରାଇଟ ଷ୍ଟ୍ରାଇକ ଦେଇଛି ଏବଂ ଷ୍ଟ୍ରାଇକ ହଟାଇବା ପାଇଁ ୪୫-୫୦ ଲକ୍ଷ ଟଙ୍କା ଦାବି କରିଛି। ୟୁଟ୍ୟୁବ ନୀତି ଅନୁସାରେ, ୩ଟି ଷ୍ଟ୍ରାଇକ ହେଲେ ଚ୍ୟାନେଲ ସବୁଦିନ ପାଇଁ ଡିଲିଟ ହୋଇଯାଏ, ଯାହା କ୍ରିଏଟରଙ୍କ ପାଇଁ ବଡ଼ ଆଘାତ।
ଭାରତୀୟ କପିରାଇଟ ଆଇନ, ୧୯୫୭ର ଧାରା ୫୨ ଅନୁଯାୟୀ, ସମାଲୋଚନା, ବିଶ୍ଲେଷଣ ଓ ରିପୋର୍ଟିଂ ପାଇଁ ସୀମିତ ମାତ୍ରାରେ କପିରାଇଟ ସାମଗ୍ରୀ ବ୍ୟବହାର ଅନୁମୋଦିତ, ଯାହାକୁ ‘ଫେୟାର ଡିଲିଂ’ କୁହାଯାଏ। କିନ୍ତୁ ଏଏନଆଇ ଏହି ନିୟମକୁ ଅଣଦେଖା କରି କ୍ରିଏଟରଙ୍କୁ ଆର୍ଥିକ ଶୋଷଣ କରୁଥିବା ଅଭିଯୋଗ ଉଠିଛି। ମୋହକଙ୍କ ସହ ଦ୍ରୁଭ ରାଠୀ, ନୀତିଶ ରାଜପୁତ, କୁନାଲ କାମ୍ରା ଓ ମହେଶ କେଶବାଲା ପରି ୟୁଟ୍ୟୁବରମାନେ ଏହି ଅଭିଯୋଗକୁ ସମର୍ଥନ କରିଛନ୍ତି। ମହେଶ କେଶବାଲା ଦାବି କରିଛନ୍ତି ଯେ, ୨ ସେକେଣ୍ଡର ଫୁଟେଜ ପାଇଁ ଏଏନଆଇ ୧୫ ଲକ୍ଷ ଟଙ୍କା ଦାବି କରିଛି।
ଏଏନଆଇ କହିଛି, ସେ ନିଜର କପିରାଇଟ ସାମଗ୍ରୀ ସୁରକ୍ଷା ପାଇଁ ଆଇନଗତ ଅଧିକାର ବ୍ୟବହାର କରୁଛନ୍ତି। କ୍ରିଏଟରମାନେ ତାଙ୍କ ଫୁଟେଜ ବ୍ୟବହାର କରି ଆୟ କରୁଥିବାରୁ ଲାଇସେନ୍ସ ଫି ଦେବା ଆବଶ୍ୟକ। କିନ୍ତୁ କ୍ରିଏଟରମାନେ ଏହାକୁ ‘ବ୍ଲାକମେଲ’ ଓ ‘ଶୋଷଣ’ ବୋଲି ଅଭିଯୋଗ କରିଛନ୍ତି। ମୋହକ ମଙ୍ଗଳ ସୂଚନା ଓ ପ୍ରସାରଣ ମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ଚିଠି ଲେଖି ହସ୍ତକ୍ଷେପ ନିବେଦନ କରିଛନ୍ତି। ସୋସିଆଲ ମିଡିଆରେ ଏହି ବିବାଦ ତୀବ୍ର ଚର୍ଚ୍ଚାର ବିଷୟ ହୋଇଛି। ଅନେକେ ମତ ପ୍ରକାଶ କରିଛନ୍ତି ଯେ, ଡିଜିଟାଲ କଣ୍ଟେଣ୍ଟ କ୍ରିଏଟରଙ୍କ ସୁରକ୍ଷା ଓ ଫେୟାର ଡିଲିଂ ପାଇଁ ଭାରତରେ ସ୍ପଷ୍ଟ କପିରାଇଟ ଆଇନ ଆବଶ୍ୟକ।
