ସମ୍ବଲପୁର, ପଶ୍ଚିମ ଓଡ଼ିଶା ବ୍ରାହ୍ମଣ ସମାଜ ପକ୍ଷରୁ ଆସନ୍ତା ଅକ୍ଷୟ ତୃତୀୟା (୩୦ ଏପ୍ରିଲ) ଦିନ ଭଗବାନ ପର୍ଶୁରାମଙ୍କ ଜୟନ୍ତୀ ମହାସମାରୋହରେ ପାଳନ କରାଯିବ। ଏହି ଅବସରରେ ସମ୍ବଲପୁର ସହରରେ ଏକ ଭବ୍ୟ ଶୋଭାଯାତ୍ରା ଆୟୋଜନ କରାଯିବା ସହ ବିଭିନ୍ନ ଧର୍ମୀୟ କାର୍ଯ୍ୟକ୍ରମ ଅନୁଷ୍ଠିତ ହେବ। ଏହି ସୂଚନା ଆଜି ସମ୍ବଲପୁରରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ପଶ୍ଚିମ ଓଡ଼ିଶା ବ୍ରାହ୍ମଣ ସମାଜର ନେତୃବୃନ୍ଦ ପ୍ରକାଶ କରିଛନ୍ତି।
ସମାଜର ମୁଖ୍ୟ ସଂଯୋଜକ ବେଣୁଧର ଦାଶ ଓ ପର୍ଶୁରାମ ଜୟନ୍ତୀ ସଂଯୋଜକ ନିଶିକାନ୍ତ ବିଶ୍ଵାଳ ସାମ୍ବାଦିକ ସମ୍ମିଳନୀରେ କାର୍ଯ୍ୟକ୍ରମର ରୂପରେଖ ପ୍ରକାଶ କରିଛନ୍ତି। ସେମାନଙ୍କ ଅନୁଯାୟୀ, ଅକ୍ଷୟ ତୃତୀୟା ଦିନ ସକାଳ ୮ଟାରେ ବୈଦ୍ୟନାଥ ଛକରେ ସ୍ଥାପିତ ଭଗବାନ ପର୍ଶୁରାମଙ୍କ ପ୍ରତିମୂର୍ତ୍ତିରେ ପଞ୍ଚୋପଚାର ପୂଜା ଓ ମହାଆଳତି ଅନୁଷ୍ଠିତ ହେବ। ଏହାପରେ ସେଠାରୁ ଏକ ଭବ୍ୟ ଶୋଭାଯାତ୍ରା ଆରମ୍ଭ ହେବ, ଯାହା ନୃସିଂହ ଗୁରୁ ଟାଉନ୍ ହାଇସ୍କୁଲ, କଂସାରୀ ପଡ଼ା, ନନ୍ଦପଡ଼ା ହେଉଛି ଝାଡୁଆପଡ଼ାସ୍ଥିତ ବ୍ରହ୍ମପୁରା ମନ୍ଦିରରେ ପହଞ୍ଚିବ।
ବ୍ରହ୍ମପୁରା ମନ୍ଦିରରେ ମହାପ୍ରଭୁଙ୍କ ବିଶେଷ ପୂଜାର୍ଚ୍ଚନା ଓ ଧର୍ମୀୟ ଅନୁଷ୍ଠାନ ଅନୁଷ୍ଠିତ ହେବ। ଶୋଭାଯାତ୍ରାରେ ଶଙ୍ଖ ଓ ସଂକୀର୍ତ୍ତନ ଦଳର ସହଭାଗିତା ରହିବ, ଯାହା ଏହାକୁ ଆହୁରି ଆକର୍ଷଣୀୟ କରିବ। ପଶ୍ଚିମ ଓଡ଼ିଶା ବ୍ରାହ୍ମଣ ସମାଜର ଶତାଧିକ ସଦସ୍ୟ ଏବଂ ତାଙ୍କ ପରିବାର ଏହି ଶୋଭାଯାତ୍ରାରେ ସାମିଲ ହେବେ ବୋଲି ଆଶା କରାଯାଉଛି।
ସମାଜର ଉପଦେଷ୍ଟା ରାମେଶ୍ୱର ପୁରୋହିତ ସାମ୍ବାଦିକ ସମ୍ମିଳନୀରେ ବ୍ରାହ୍ମଣ ସମାଜର ଐକ୍ୟ ଓ ସାଂସ୍କୃତିକ ପରମ୍ପରାକୁ ସୁଦୃଢ଼ କରିବାର ଆବଶ୍ୟକତା ଉପରେ ଗୁରୁତ୍ୱ ଦେଇଛନ୍ତି। ସେ କହିଛନ୍ତି, “ଭଗବାନ ପର୍ଶୁରାମଙ୍କ ଜୟନ୍ତୀ କେବଳ ଏକ ଧର୍ମୀୟ ଉତ୍ସବ ନୁହେଁ, ଏହା ଆମର ସାମାଜିକ ଏକତା ଓ ସାଂସ୍କୃତିକ ମୂଲ୍ୟବୋଧକୁ ପୁନର୍ଜାଗରଣ କରିବାର ଏକ ଅବସର।”
ମିଡିଆ ସଂଯୋଜକ ବ୍ୟୋମକେଶ ପଣ୍ଡା କାର୍ଯ୍ୟକ୍ରମର ପ୍ରାରମ୍ଭିକ ସୂଚନା ପ୍ରଦାନ କରିଥିବା ବେଳେ ଆବାହକ ଦେବାଶିଷ ପୁରୋହିତ ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି।
ଏହି ସIମ୍ବାଦିକ ସମ୍ମିଳନୀରେ ପଶ୍ଚିମ ଓଡ଼ିଶା ବ୍ରାହ୍ମଣ ସମାଜର କାର୍ଯ୍ୟକାରୀ ଅଧ୍ୟକ୍ଷ ଫଣିନ୍ଦ୍ର ପଣ୍ଡା, ସୌରଭ ରଞ୍ଜନ ମହାପାତ୍ର, ଅରବିନ୍ଦ ମହାପାତ୍ର, ତୃପ୍ତି ପଣ୍ଡା, ବସନ୍ତ ମିଶ୍ର ଏବଂ ବ୍ରହ୍ମପଣ୍ଡିତ ମହାସଭାର ସଭାପତି ରବିନାରାୟଣ ପଣ୍ଡା ପ୍ରମୁଖ ଉପସ୍ଥିତ ଥିଲେ।
ପଶ୍ଚିମ ଓଡ଼ିଶା ବ୍ରାହ୍ମଣ ସମାଜ ସମସ୍ତ ସମାଜ ସଦସ୍ୟଙ୍କୁ ଏହି ପବିତ୍ର ଅବସରରେ ସାମିଲ ହେବାକୁ ଆହ୍ୱାନ ଜଣାଇଛି। ସମାଜର ନେତୃବୃନ୍ଦ କହିଛନ୍ତି ଯେ, ଏହି ଶୋଭାଯାତ୍ରା ଓ ପୂଜାର୍ଚ୍ଚନା କାର୍ଯ୍ୟକ୍ରମ ସମାଜର ଐକ୍ୟ ଓ ସମୃଦ୍ଧ ସାଂସ୍କୃତିକ ପରମ୍ପରାକୁ ଆହୁରି ସୁଦୃଢ଼ କରିବ।
ଅକ୍ଷୟ ତୃତୀୟା ଓ ଭଗବାନ ପର୍ଶୁରାମ ଜୟନ୍ତୀକୁ ନେଇ ସମ୍ବଲପୁରରେ ଏକ ଧର୍ମୀୟ ଓ ସାଂସ୍କୃତିକ ଉତ୍ସାହ ଦେଖାଦେଇଛି। ସ୍ଥାନୀୟ ବ୍ରାହ୍ମଣ ସମାଜ ଏହି କାର୍ଯ୍ୟକ୍ରମକୁ ସଫଳ କରିବା ପାଇଁ ବ୍ୟାପକ ପ୍ରସ୍ତୁତି ଆରମ୍ଭ କରିଛନ୍ତି। ଏହି ଶୋଭାଯାତ୍ରା ସମ୍ବଲପୁର ସହରରେ ଏକ ଅନନ୍ୟ ଧର୍ମୀୟ ପରିବେଶ ସୃଷ୍ଟି କରିବ ବୋଲି ଆଶା କରାଯାଉଛି।
